PJJ Tanggal 5 -11 April 2020.
Bahan : Roma 8 : 9-11
Tema : Geluh Si Mbaru ibas Kristus.
( Ngelakoken Kebaktin Kamis Si Badia, Jumat Si Mbelin, Ssabtu Pengarapen ras Paskah )
Shalom, mejuah-juah man banta kerina.
Sekalak perbapaan ngajarken anakna sirusur melawen medak, nina “nakku, aku nai medak jam 5 erpagi-pagi, mis kuaturken dahinku guna nampati bulangndu, kenca e ersikap aku ku sekolah, mulih sekolah nari, mis ka aku nampati bulangndu. Bagem tep-tep wari kulakoken maka banci aku bagi genduari enda. Emaka nakku, perobahilah langkahndu e. Labo medem lalap dahinndu”. Emaka nina anakna ngaloi, nina, “ itu khan bapak, sekarang sudah beda pak, gak gitu lagi”. Arah e tempa-tempa anak e erpengakap maka la lit hubungenna peristiwa masa lalu ras situasi genduari enda.
Kita rusur erbahan peringet-ingeten kerna kejadin masa lalu. Kai nge hubungenna ras kegeluhennta ibas masa genduari enda ?
Ibas minggu enda kita ngelakoken peringet-ingeten kerna peristiwa siterjadi 2000 tahun si lewat. Ibas peristiwa e Dibata encidahken kuasa ras kekelengenNa guna keselamaten doni enda. Peristiwa siniperingeti kita ibas minggu enda emekap Kamis Si Badia, Jumat Si Mbelin, Sabtu Pengarapen ras Paskah.
a. Ibas peristiwa Kamis Si Badia lit piga-piga hal sinilakoken Tuhan Yesus. Ia mpepulung murid-muridna ibas sada rumah. Kenca gelap wari maka Yesus ras murid-muridNa man roti Paskah. (Matius 26:17-29). Erkiteken si e me maka ibas piga-piga Gereja erbahan Lakon Persadaan Si Badia ibas berngi ope Yesus itangkap, Rikutken Yohanes 13, ibas berngi e pe Yesus ngelakoken acara murihi nahe ajar-ajarNa. Erkiteken peristiwa e ka me maka ibas piga-piga Gereja ngelakoken acara murihi nahe ibas kebaktin Kamis Si Badia. Arah peristiwa enda ate Tuhan encidahken kekelengen, kerembakenNa ras ajar-ajar, kiniersadaan, kiniteruken ukur, ras kesetian.
b. Peristiwa Jumat Si Mbelin ngingetken man banta kerna kiniseran Tuhan Yesus. Ibas berngi Ia itangkap, itadingken murid-murid, iadili Iman Si Mbelin Kayapas, ipersoken Petrus. Erpagi-pagi Yesus ibaba ka ku Gubernur Pilatus guna iadili. Yesus pe ibaba ku Herodes janah Yesus igombangi-gombangi Herodes. Kenca bage Yesus ibaba mulihi ku Pilatus guna ndatken keputusen hukumenna. Kalak si enterem lebih milih mbebasken Barnabus janah mendesak Pilatus nalibken Yesus. Emaka iputusken Pilatus me maka Yesus iukum mate. Kiniseran Yesus reh mesangatna, Ia igombang-gombangi, iciduri, ipekpek, ipakeken mahkota duri, isuruh mersan kayu persilangna jine, ipakuken i kayu persilang jenari mate me Ia.
c. Kenca Yesus mate ras ikuburken, diberu-diberu, singikutken Yesus Galilea nari, mulih ku rumah guna nikapken rempah-rempah si merim ras minak wangi guna mait Yesus, erkiteken wari e me wari Jumat, janah jam persikapen wari Sabat nandangi reh. Ibas wari Sabat kalak enda la erdahin (Lukas 23:54-56). Ibas pusuhna, Yesus enggo mate janah arus ilakoken tradisi minaki kalak si enggo mate. Saja erkiteken enggo mengketi wari Sabat kalak enda la banci ku kuburen guna minaki mait Yesus. Mulai Jumat karaben seh kubas wari Sabtu, kalak enda tetap i rumah, nimai-nimai wari Minggu guna ngelakoken tradisi minaki mait. Ibas paksa nimai-nimai enda tuhu-tuhu tergejap uga situasi kebenen kalak enda. Kalak enda ngarapken wari terang gelah banci minaki mait Yesus, labo ngarapken wari terang guna jumpa ras Yesus si keke. Paksa e kalak enda la erpenginget nandangi padan Yesus kerna kekekenNa ibas wari si peteluken. Ibas paksa enda kita enggo erpengangkaan kerna kekeken Tuhan Yesus Kristus. Emaka ibas kita ngerayaken Sabtu Pengarapen enda sijadi titik fokusta emekap gelah kita la hanya nggejapken kebenen kalak sinikelengi kita entah pe kebiaren kerna kematen tapi tek maka kuasa Yesus Kristus me simpekeke kalak si mate si tek man baNa. Enda me titik fokus pengarapennta ibas Sabtu Pengarapen.
d. Ibas wari Minggu erpagi-pagi, diberu-diberu dingen ajar-ajar isenggetken Yesus alu encidahken diriNa si enggo keke ibas si mate nari. Yesus ningetken maka kai sinipadankenNa tuhu-tuhu enggo jadi. Emaka arah peringeten wari Paskah, kita tuhu-tuhu isingetken kerna kemenangen Tuhan Yesus ibas naluken kuasa dosa, kematen.
Enda me peristiwa karya keselamaten sinilakoken Dibata itengah-tengah doni enda. Genduari kita ngelakoken peringet-ingeten enda. Ibas kita ngelakoken peringet-ingeten enda, Kesah Si Badia simpengasup kita erkiniteken nandangi Padan Dibata. Efesus 4:14, nina, “ Kesah e me jadi jaminen maka sialoken me kai si enggo ipadanken Dibata man anak-anakNa. Kesah e pe jadi jaminen man banta maka la bani lang idungi Dibata dahinNa guna nebusi kita, kalak si enggo jadi sikerajengenNa. Terpuji dingen ermulialah Dibata”. Kesah Si Badia me singajari dingen simbukaken pusuh-perukurennta kerna kai sura-sura Dibata ibas ngelakoken karya keselamaten enda. Ibas Roma 8: 23, nina, “Sabab ibas sada wari pagi ibebasken Dibata me kerina si enggo ijadikenNa e ibas perbudaken si erbahanca ia kernep, gelah ia merdeka janah ngenanami kebebasen dingen kemulian ras kerina anak-anak Dibata”. Kesah Si Badia me si mereken kegeluhen si mbaru dingen si mpengasup kita guna nggeluhken kegeluhen si mbaru. Roma 8: 2, “ Kesah, si biakna kin mereken kegeluhen man kalak si lit ibas persadaan ras Kristus Yesus, enggo mulahi kam ibas biak dosa ras kematen nari”, bage pe Roma 8: 11. Kesah Si Badia simimpin pusuh perukurennta maka kita lanai ndalanken sura-sura doni enda tapi ngelakoken sura-sura Kesah Si Badia e. Kesah Si Badia me sinjadiken kegeluhen Tuhan Yesus sebagai usihen, motivasi ras inspirasi ibas kegeluhenta.
Jadi, nginget masa lalu labo sekedar seremonial, bernostalgia dengan masa lalu si lalit dampakna kubas kegeluhennta masa genduari enda. Bujur ninta man Dibata erkiteken pendahin Kesah Si Badia, kai sijadi 2000 tahun si lewat tetap mereken kegeluhen man banta genduari enda ras seh rasa lalap. Emaka marilah silakoken peringeten Kamis Si Badia, Jumat Si Mbelin, Sabtu Pengarapen ras Paskah enda. Aminna gia kerina enda silakoken ibas jabunta sekalak-sekalak, si jadi fokusta emekap ulih pendahin Kesah ibas kegeluhenta. Arah peringet-ingeten enda kita ndatken pergegeh guna kegeluhenta genduari enda. Selamat Paskah.
Pdt. Tanda Pinem
GBKP Rg. Jl. Sei Batang Serangan