Posts

Posted on

Renungan Malam 31 Mei 2020

  1. Rende KEE GBKP No. 201:1.
    1. Malem ate tuhu-tuhu, si ernalem man baNdu. Kam Dibata si njadiken langit ras doni enda. SalsaliNdu pusuh kami, maka t’rangNdu tergejap. Kalak si tek la kap bene, ban kelengNdu e tetap.
  2. Ertoto Guna Pengogen Kata Dibata.
  3. Pembacaan Firman Allah. Kejadian 41:35-36
    “Mereka harus mengumpulkan segala bahan makanan dalam tahun-tahun baik yang akan datang ini dan, di bawah kuasa tuanku Firaun, menimbun gandum di kota-kota sebagai bahan makanan, serta menyimpannya. Demikianlah segala bahan makanan itu menjadi persediaan untuk negeri ini dalam ketujuh tahun kelaparan yang akan terjadi di tanah Mesir, supaya negeri ini jangan binasa karena kelaparan itu.”
    Renungen :
    Bangsa Mesir diperhadapkan dengan 7 tahun masa kelimpahan dan 7 tahun masa kelaparan. Oleh karena itu harus ada seorang yang memimpin untuk mengaturkan agar dalam masa kelimpahan tidak boros sehingga dalam masa kelaparan tetap ada makanan. Allah memberi kebijaksanaan bagi Jusuf untuk memimpin pelaksanaan tugas ini.
    Pandemi covid-19 ini memang mengharuskan kita menata kembali semua prioritas kita. Tuhan Allah memampukan kita untuk mengelola kehidupan kita, seperti Jusuf yang mengelola masa kelimpahan dan masa keleparan.
    Segala berkat Allah yang kita telah terima, haruslah kita tata kembali. Di dalam setiap pekerjaan kita, kita harus menata diri. Hati dan pikiran kita tidak hanya terfokus kepada pekerjaan saja tetapi kita juga harus menata kesehatan diri dan kesehatan keluarga kita. Rencana pengeluaran-pengeluaran yang sebelumnya telah kita buat, kita atur kembali. Kita lebih memprioritas pengeluaran kita untuk kebutuhan hidup sehari hari dan kesehatan kita. Sumber-sumber pemasukan yang selama ini mungkin tidak maksimal kita jalankan, kita kembangkan untuk mendukung pemasukan kita. Yang juga penting adalah menata pemahaman yang sama di tengah-tengah keluarga. Setiap anggota keluarga hendaknya memahami bahwa kita sedang dalam situasi pandemi. Oleh karena itu setiap anggota keluarga menjalankan hidup dalam kasih, sukacita, damai sejahtera, kesabaran, kemurahan, kebaikan, kesetiaan, kelemahlembutan dan penguasaan diri. Kita percaya, Allah memampukan kita untuk menghadapi keadaan ini dan kita tetap mendapatkan kecukupan.
  4. Ertoto Kenca Renungen
  5. Rende KEE GBKP No. 187:1,3.
    1. Gegeh Kuasa Kesah Si Badia, ib’re Tuhan bangku tiap jam. Katawari itemaniNa, iidahNa kai pe si kuban. Perdalanku pe ikawaliNa, setan iblis ipelawesNa. Kuasa doni la ergegeh bangku. Tuhan saja man ikutenku.
    2. Tiap wari Tuhan kap ras aku, pemereNa nge geluhku e. IangkatNa adi guling aku, talukenNa iblis jahat e. malem kal ateku temaniNa, keleng ate dem kap bas Ia. Tah ndekah tah kentisik pe gia, la ateku sirang ras Ia.
  6. Ertoto safaat ras Pertoton Tuhan.

Pdt. Tanda Pinem

GBKP Rg. Jl. Sei Batang Serangan

Posted on

Bahan PJJ 31 Mei – 6 Juni 2020

Bahan Ogen : Keluaren 34:22; 2 Korinti 9:10-11.
Tema : Pestakenlah Kerja Rani.


Shalom, Mejuah-juah.
Kegeluhen ibas masa perbudaken i Mesir, peristiwa ndarat i Mesir nari, bage pe perdalanen i gurun pasir kenca ndarat i Mesir nari, e jadi peringet-ingeten si mbelin ibas kegeluhen bangsa Israel. Arah peristiwa enda, kalak Israel nandai dingen ngakuken ise kin Dibata e, bage pe bangsa Israel ngakuken dirina sebage bangsa Dibata. Ibas Ulangen 7:7-15, iakuken bangsa enda maka erkiteken keleng ate Dibata me maka Dibata milih bangsa Israel, labo erkiteken teremna. Dibata nginget padanNa nandangi nini-nini bangsa Israel maka Dibata mbebasken bangsa enda ibas perbudaken i Mesir nari. Dibata encidahken keleng ateNa alu ngukum kalak si ernembeh ate man baNa, mereken pasu-pasu, dingen mpedauh pinakit bagi sinialami bangsa Mesir.
Nginget keleng ate Dibata, arah pembebasen i Mesir nari emaka, bangsa Israel pe ngataken bujur. Lit telu perayaan si mbelin guna ngataken bujur kerna keleng ate Dibata enda.
Sipemena eme wari Paskah ras wari Raya Roti la tama ragi. Peristiwa Paskah ngingetken kerna berngi tupung malekat ngelewati rumah kalak Israel guna munuh anak sintua ibas bangsa Mesir. Wari raya roti la tama ragi, ngingetken kerna 7 wari pertama bangsa Israel ndarat i Mesir nari. Duana peristiwa enda irayaken jadi sada. Emaka ibas Paskah, bangsa Israel man roti si la tama ragi.
Sipeduaken wari raya pitu Minggu. Sendalanen ras bahan ogenta Keluaren 34:22, wari raya enda irayaken ibas wari pe50ken (Pentakosta), kenca wari persembahen pungo gandum si pemena (Imamat 23:9-10; 15). Ibas Imamat 23: 22, bangsa Israel pe ipersingeti gelah ola mperani jumana seh ku duru, bage pe gandung si tading olanai iulihi. Kerina enda guna kalak musil ras kalak pertandang. Rikutken Ulangen 16:9-12, wari raya enda igelari Kerja Rani. Kerja rani enda ilakoken alu meriah, raduken anak-anak, suruh-suruhen, kalak Lewi, kalak pertandang, anak melumang, diberu balu-balu. Kerina enda guna ngingetken maka bangsa Israel nai pe budak i Mesir.
Sipeteluken wari raya sapo-sapu. Wari raya enda guna mperingeti bangsa Israel si erlajang i gurun pasir kenca ndarat i Mesir nari janah tading ibas sapo-sapo ( Imamat 23:43).
Ibas teluna perayaan kegeluhen bangsa Israel, tangkas maka enda ilakoken guna nginget dingen ngataken bujur nandangi keleng ate Dibata si enggo nepati padanNa dingen milih bangsa Israel jadi bangsa pilihenNa alu cara mbebasken bangsa Israel ibas perbudaken i Mesir nari.
Ibas Padan Si Mbaru, peristiwa Pentakosta ( wari pe50ken) lit ije makna si mbaru. Rikutken Kitab Perbahanen Rasul-Rasul 2:1 ikataken “asum wari raya Pentakosta”, e nuduhken perayaan Pentakosta kalak Yahudi entah pe Kerja Rani. Erkiteken si e, bagi semalna perayaan keagamaan kalak Yahudi, ibas 3 perayaan si mbelin, maka kalak Yahudi rehen i belang-belang doni ku Yerusalem ( ayat 5). Ibas perayaan wari Pentakosta e me Nusur Kesah Si Badia alu rupa dilah api encinepi sada-sadai kalak si tek man Tuhan Yesus Kristus. Kerina si pulung e dem alu Kesah Si Badia janah ngerana ia ibas cakap si deban, bagi ibere Kesah e ia ngerana (4). Alu kuasa Kesah Si Badia Rasul Petrus ersaksi janah ibas wari e lit 3000 kalak si tek man Tuhan Yesus Kristus. Arah peristiwa enda nuduhken zaman si mbaru. Kesah Si Badia mpengasup ajar-ajar ngerana ibas cakap si deban. E ngatakenca keselamaten e isehken Dibata man kerina bangsa. Lanai terpusat ku bas sada bangsa bagi ibas Padan Si Ndekah. Alu bage, ngataken Nusur Kesah Si Badia labo berarti ope ia nusur ibas wari Pentakosta, Kesah Si Badia la erdahin. Ibas bahan Kotbah Minggu enda saja, Yesaya 63:11-14, icidahken man banta maka Kesah Si Badia erdahin kap. Saja perbedaanna e me ibas Padan Si Ndekah, pendahin Kesah Si Badia terbatas nandangi kalak Israel saja, e pe khusus man kalak si idilo Dibata guna ndahiken dahin si khusus. Tapi ibas Padan Si Mbaru, arah peristiwa Nusurna Kesah Si Badia, kerina bangsa ngaloken Kesah Si Badia. Kesah Si Badia bengket kubas pusuh ukur kalak si tek guna nampati kita. Enda me cikal bakal Gereja si terbuka nandangi kerina bangsa. Kesah Si Badia me sipersadaken kerina kalak si tek.
Penggejapen ibas kiniersadaan enda siilumbaken Paulus man perpulungen Korinti. Ipetetap Paulus ukur kalak Korinti guna nerusken dahin mpepulung penampat man kalak Yerusalem si tantangna enggo turah ibas pusuh kalak Korinti. Ipetetap Paulus ukur kalak Korinti alu ningetken kerna pengepkepen Dibata doni enda. Ia nikapken benih ras pangan man manusia. Dibata si masu-masu kalak si merdang alu ulih si erlipat ganda. Dibata me si erbahanca maka kalak Korinti bayak dingen mereken ukur melumbar mere. Jenari Paulus ningetken kerna ulih penampat si sehken kalak Korinti e alu ngataken maka enterem kalak si ngataken bujur man Dibata erkiteken pemere kalak Korinti e.
Wari Raya pitu minggu entah pe Pentakosta entah pe Kerja Rani ibas kalak Israel ningetken kerna keleng ate Dibata si enggo mbebasken bangsa Israel ibas perbudaken Mesir nari, emaka bangsa Israel pe ibas paksa ia rani la ikerikenna seh ku duru janah lanai mpepulung mulihi gandum si tading-tading ibas juma guna kalak musil dingen kalak pertandang, kita pe ibas mperingeti Nusurna Kesah Si Badia, sigejap maka Dibata me si erkeleng ate man banta. IberekenNa Penampat man banta. Kesah Si Badia ka nge simpengasup kita guna sipenggejapen nampati kalak si deban. Terlebih ibas paksa genduari enda, kerina nge kita terdampak pandemi covid-19 enda. Tapi, marilah asa ngasup gegehta siteruskenlah muat bagin guna si sampat-sampaten. Si ingetlah Kerja Rani guna nampati kalak si deban.
Selamat Nikapken diri ngelakoken Kerja Rani.

Pdt. Tanda Pinem

GBKP Rg. Jl. Sei Batang Serangan