GBKP Batang Serangan Medan

Bahan Ogen : Jesaya 45 : 22-25
Tema : Dahilah Tuhan (Spiritualitas).

Shalom, mejuah-juah man banta kerina.

Perpulungen sinikelengi Tuhanta Yesus Kristus,
Ibas situasi penyebaran Virus Corona-19, tema si seh man banta emekap Spiritualitas. Salah salah sada tolak ukur spiritualitasta rusur inehen arah kerehennta ndahi rumah pertoton Tuhan. Emaka, ibas anjuran kerna penyegahan penyebaran virus corona-19, ija kita iarapken guna erdahin rumah nari, erlajar i rumah ras beribadah i rumah, emaka tempa-tempa nggo urak spiritualitasta. Alu kata sideban, lit si erpangakap maka enggo kita biaren nandangi virus asangken pendilo Dibata guna reh ku rumah pertoton. Kuga nge pengangkanta kerna Dahilah Tuhan entah pe spiritualitas e ?

Sendalanen ras bahan PJJ siisikapken GBKP, kita banci erlajar kerna spiritualitas. Rikutken bahan ogen PJJ, ije isengetken kerna pendilo Dibata man kerina bangsa-bangsa guna ndahi Tuhan. Engkai maka Dibata erdilo ?
Guna ngangkai pendilo Dibata enda kita banci ngoge mulai Yesaya 44:24. Mulai Yesaya 44:24, ije ituriken kerna Dibata ngenca Dibata si sada, la lit si deban. Dibata nuriken maka Ia ngenca Dibata, la lit si deban, alu erbage-bage cara.
Sipemena. Ia me si nepa manusia, mulai kin ibas bertin nari. Ia sinjadiken si nasa lit, si sada, la lit si deban si nampatisa ( Yesaya 44:24). Guru-guru pertendung Kupebodoh-bodoh, nina Dibata. Perkataan kalak pentar ipersilahang Dibata (Yesaya 44:25). Sebalikna, berita si ipeseh persuruhen Tuhan, tuhu-tuhu jadi (Yesaya 44:26). Bagenda me Dibata encidahken kuasaNa nandangi si nasa lit, termasuk pe ibas milih dingen ngangkat Raja Kores. Dibata ngataken kempak Raja Kores, “ Kam merentah guna Aku, lako ndalanken sura-surangKu”, emekap guna naluken bangsa-bangsa, nangtangi kuasa raja-raja, ras nalangi kerabangen kuta-kuta guna Tuhan ( Yesaya 44:28, Yesaya 45:1). Tuhu sulit nge siakap ngalokennca, adi Raja Kores si la nandai Dibata, tapi ikataken Dibata maka ia me raja sipilih ras siidilo Dibata(Yesaya 45:4). Tapi bage me pengakun ibas Kitab Yesaya enda, maka Dibata erkuasa ngaturken kegeluhen raja si la nandai Ia pe.
Sipeduaken. Dibata mpetangkas kuasaNa alu ngataken maka Ia me si nepa doni, janah njadiken manusia guna ngianisa ( Yesaya 45: 12). Dibata kap si nepa langit, la lit dibata si deban, seakatan Ia. ItepaNa ras ipetembeNa doni enda, paguh dingen tahan ibas inganna. Taneh enda itepaNa la burbar, la mesuni tapi mehuli, gelah banci iiani. Nina Tuhan, “Aku kap Tuhan, si deban la lit dibata” (Yesaya 45:18).
Sipeteluken. Kuasa Dibata e tangkas arah Ia singkelini kerina manusia. “Ma kin Aku, Tuhan, Dibata si adil ras si Engkelini ? Seakatan Aku, la lit Dibata”. Mari, dahilah Aku maka kam Kukelini, o kam kerina manusia i doni. Sabab Aku ngenca Dibata, la lit si debanna” (Yesaya 44:21-22). Kata-kata enda itujuken man kalak ‘si erbaris siarak-araken maba gana-gana kayu; siertoto man gana-ganandu’ (Yesaya 44:21). Alu kata si deban, amin kalak enda nembah man gana-gana, janah erkiteken si e kalak enda arusna iukum, tapi Dibata tetap ndilo kalak e guna ikelini, sabab gana-gana e labo banci engkelini. Dibata ngenca si ngasup engkelini. Enda me artina keadilan Dibata. Enda me sinuduhken maka Dibata ngenca Dibata si tuhu-tuhu, la lit si deban. Dibata erpadan, maka kai siikatakenNa e tuhu, janah la mobah-obah. Ibas paksana pagi erjimpuh me kerina manusia ilebe-lebe Dibata, janah ikataken manusia e, “Arah Tuhan ngenca maka lit kemenangen ras kuasa”. Dibata pe nehken padanNa nandangi kesusuren Jakup. Kesusuren Jakup la banci lang ndatken kemenangen.
Enda me palasna maka Dibata ndilo kerina manusia. Dibata ngenca Dibata, la lit si deban. Ia adil dingen erkuasa guna engkelini.
Erpalasken pengangkaanta enda, maka spiritualitas banci sikataken emekap kerehennta guna ndahi Tuhan. Kita reh ndahi pendilo Dibata erkiteken kita tek maka Dibata ngenca, la lit si deban si adil dingen si engkelini manusia. Kita tek maka kegeluhenta enda me bukti keadilen ras pengkelini Dibata. Kita iselamatken Dibata arah kematen Yesus Kristus, aminna gia situhuna kita nge si patut iukum mate. Kai si lit ibas kegeluhenta enda, misalna pemeteh, kengasupen, kesempaten ras erta si lit ibas kita, e pe bukti keadilen ras pengkelini Dibata. Pengakun kerna kegeluhenta enda me bukti keadilan ras pengkelini Dibata sicidahken arah kerehenta ndahi Dibata. Kerehenta ndahi Dibata banci sicidahkan arah erbage-bage bentuk.
Ibas kita reh ndahi Dibata, kita makeken kerina kegeluhenta guna kemulian Dibata. Ija pa pe ras katawari pe, sipakekenlah pemeteh, kengasupen, kesempaten ras erta si lit ibas kita guna mpermuliaken Dibata. Teridahlah kita kalak simpermuliakan Dibata arah perukuren, pengerana ras perbahanennta. Alu kata si deban, kita encidahken spiritualitasta la terbatas ibas ruang ras waktu tertentu saja, tapi katawari pe ras ija pe kita harus encidahken maka kita kalak si reh ndahi Dibata.
Kita pe reh ndahi Dibata ibas ingan ras waktu tertentu, misalna alu ibadah pribadi, ibadah keluarga, ibadah perpulungen ras ibadah minggu.
Alu bage, melala bentukna kita encidahken spiritualitasta. Bentuk-bentuk enda isingetken gelah si eteh maka guna encidahken spiritualitas labo kita hanya ngenehen kubas kerehennta kubas kebaktin minggu saja entah PJJ ( Tidak memakai kehadiran di Gereja atau PJJ sebagai satu-satunya ukuran spiritualitas kita). Emaka adi guna menghambat penyebaran virus corona-19 kin maka kita la erbahan kebaktin minggu ras-ras i gereja entah pe erPJJ raduken ngawan ibas sector PJJ-nta, tapi kita erbahan kebaktin Minggu entah PJJ ibas jabunta masing-masing, labo e encidahken maka enggo kurang spiritualitasta. Spiritualitasta pe teridah ibas pengangkaanta maka kerina kejadin ibas doni enda, termasuk penyebaran virus corona-19, tetap iteruh kuasa Dibata. Bali nge sulitna tupung ngangkai Dibata ndilo dingen milih Kores, si la nandai Dibata, guna jadi raja si mulahi bangsa Israel. Tapi bage me kuasa Dibata. Erkiteken tek kita maka Dibata nge erkuasa ibabo penyebaran virus corona-19 enda, maka sipindolah man Dibata guna engekelini kegeluhen manusia enda. Tetaplah si pindo man Dibata segelah mereken gegeh ras kesehatan man kerina petuga medis si nangani korban virus corona-19 enda, bage pe pasien-pasien ipasu-pasu Tuhan penyembuhenna. Bage pe, adi banci kita “bekerja dari rumah, belajar di rumah dan beribadah di rumah”, e enggo encidahken tanggungjawab spiritualitasta nandangi persoalan penanganan penyebaran virus corona-19 enda.
Ibas situasi penyebaran virus corona-19 enda, sipakekenlah kesempaten enda guna mpegegehi kiniersadaannta itengah-tengah jabunta ras reh teridahlah tetap spiritualitasta.
Tuhan si masu – masu kita kerina.

Pdt. Tanda Pinem

GBKP Rg. Jl Sei Batang Serangan Medan

Tema : Beritakenlah si mehuli (TI: Guna ras Tujun)
Teks : Perb. Rasul-rasul 15:22-29

Tekhnologi Informasi adalah semua tekhnologi berbasis komputer yang memampukan seseorang untuk mengumpulkan, menyimpan, mengakses dan bertukar segala jenis informasi di dunia yang dikomunikasikan melalui internet. Menurut laporen Asosiasi Penyelenggara Jasa Internet Indonesia (APJII), ibas tahun 2017, + 143 juta kalak Indonesia enggo terhubung ku Internet. Ertina sejak tahun 2017 lk 55% penduduk Indonesia menjadi pengguna Internet ras e terus meningkat seh genduari enda. Secara global Indonesia lit ibas uruten ke-5 kenca China, India, Amerika Serikat ras Brazil.
Riset siilakoken APJII man 2500 pengguna internet engataken maka mayoritas pengguna internet (72,4%) eme masyarakat kalangen urban. Secara demografis pengguna internet e lit ibas usia 19-34 tahun (49,5%), strata ekonomi sosial menengah ke bahwah (74,69%). I tinjau arah prilaku pengguna Internet si mayoritas kalak nguda e cenderung konsumtif ras langga bo serius makeken kekuaten tekhnologi. Internet buen dengga i pake sekedar chating, berjejaring sosial i dunia maya, browsing, ntah sekedar ngenen foto ras vidio.
Ibas pengguna internet si langga optimal enda Indonesia justru jadi negara no 1 i dunia ndatken serangen dunia maya. Selain rentan jadi korban ntahpe pelaku kejahaten i dunia maya pengguna internet I Indonesia cenderung menjurus kubas gejala kecanduan sebab Indonesia lit ibas uruten ke 4 sebage pengguna internet tertinggi eme 8 jam 51 menit ibas sada wari.Langga pernah terjadi ibas sejarah bahwa manusia ngkeriken buen waktuna alu natap layar daripada berelasi ras kalak sideban.
La terpungkiri memang, kemajun tekhnologi informasi ras komputer genduari e enggo mpebayak (sekaligus memborbardir) kegeluhen manusia alu erbage media. Secara sederhana media banci idefenisiken sebage sesuatu si berada di antara. Ibas kaitenna ras komunikasi bagepe informasi melalui tekhnologi komputer maka media e eme alat/perangkat tekhnologi si lit antara si nehken berita ras si ngaloken beritaEmaka manusia terus berupaya meningkatken media komunikasi gelah mbue permasalahen ibas geluh enda banci iatasi. Manusia memahami bahwa peradaben manusia bergantung kal kubas perkembangen media komunikasi si ipake. Reh pedasna berita e seh maka peradaben manusia reh pedasna meningkat. Tapi masalah si turah ibas cara erkomunikasi lewat tekhnologi pe perlu iwaspadai. Pandangan gnotisis pe banci berkembang alu pedas. Aspek si la teridah e lebih tinggi nilaina asangken aspek si teridah. Manusia banci cenderung ngidah komunikasi ras relasi i dunia maya ndauh kal ulin asangken komunikasi ras relasi secara langsung ras nyata. I samping sie cara komunikasi lewat tekhnologi erbahansa manusia mengalami kegeluhen alu identitas ganda (dunia nyata ras dunia maya). Peluang erbual, nipu semakin terbuka lebar.
Ibas teks PJJ nta sekali enda surat ipake sebage media komunikasi gereja mula-mula guna nehken hasil persidangen i Yerusalem. Si menarik i jenda bahwa pertua-pertua ras Rasul-rasul la mengandalken surat e saja tapi tetap ibahan utusen guna maba surat e man perpulungen si labo kalak Yahudi si ringan i kuta Antiokhia, i propinsi Siri ras propinsi Kilikia. Engkai la cukup surat e saja i kirimken? Engkai arus lit utusen? Ras utusen si iban pe labo kalak biasa. Paulus, Barnabas, Barabas ras Judas eme kalak si ihamati i tengah perpulungen termasuk perpulungen si labo kalak Yahudi. Ternyata arah enda perlu kita erlajar bahwa lit nge hal si perlu isehken cukup arah media e saja tapi lit hal si labo banci iandalken media e saja. Keputusen sidang e perlu dengga penjelasen arah kalak si mengikuti sidang e alu tutus sebab kemampun media menjelasken, mendengarkan, menyaring labo lit. Kai si itulisken perberita e ka nge si ialoken kalak si ngaloken berita. Media hanya mampu mpeseh berita melalui bahasa tulisen. Bahasa tubuh labo ia ngasup mpesehsa. Erkiteken sie perlu kal kita bijak ibas makeken media elektronik e. Berita sebagai hasil keputusen perlu ipeseh arah media e tapi ersidang labo perlu ibas media e.

Pdt. Rosnelli Br Sembiring, MA ,M.Th
GBKP Rg Bena Meriah

Bahan : 2 Korinti 5:16-19
Tema : Perukuren si Mbaru (Evaluasi Entreprenurship)
LATAR BELAKANG

1. Kitab 2 Korinti enda itulis rasul Paulus i Makedonia nari man perpulungen Korinti, e me guna ngkuhi suratna si pemena ndube, ija lit denga kalak si menentang ras nulak kerasulenna. E maka surat sipeduaken enda membela kerasulenna, mendukung gelah kerina perpulungen tetap setia ibas ajaren si benar ras pe mperlengkapi perpulungen guna ngalaken tantangen geluh ras pelayanen.
2. Ibas bahan Pjj-nta, alu perikop: erdame ras Dibata arah Kristus, kita ibabai guna memahami uga kin erti ras makna erdame ras Kristus Jesus e.
   PENJELASEN
3. Perdamen manusia ras Kristus labo perbahan kiniulin manusia, tetapi murni inisiatif Kritus. “Dibata nge si nikapken kita guna si e, janah selaku jaminenna, Dibata enggo mereken KesahNa man banta” (2 Kor.5:5). “Sebab erkiteken lias ate Dibata nge maka kam terkelin, erkiteken tek kam man Kristus” (Ef.2:8).
4. Kalak si nggejap maka kekelengen Kristus e nge maka seh kita ku sada pengertin : “Sekalak Manusia enggo mate guna kerina manusia. Enda ertina maka kerina manusia e enggo mate. Ia mate guna kerina manusia, gelah kalak si nggeluh lanai nggeluh erbana-bana, tapi guna Ia si enggo mate dingen si enggo ipekeke Dibata ibas si mate nari” (2 Kor.5:14-15).
5. Kalak si enggo ngantusi keleng ate Kristus e pengerganna nandangi manusia lanai rikutken pertimbangen doni enda (ay.16). Adi pertimbangen doni enda e me erpalasken kai si teridah: erta, jabaten, fisik/lahiriah ras sidebanna. Contoh: nabi Samuel ngehen Eliap anak, Isai (1 Sam.16:6-7). Tapi kalak si enggo nandai (tek) man Tuhan ia ngergaken manusia bagi Kristus ngergaken manusia. Uga kin Kristus ngergaken manusia? E me alu njadiken musuhna jadi temanNa (2 Kor.5:18). Bage me kalak si tek idilo njadiken musuh jadi temanna (band. Kua.16:7).
6. Kalak si enggo nggejapken keleng ate Tuhan e, kalak si enggo tek man Tuhan, perukurenna ipelimbarui, “Adi kalak ersada ras Kristus, ia me tinepa si mbaru, si male enggo lepas, janah nehenlah si mbaru enggo reh” (ay.17). Alu kata sideban, “Lanai aku si nggeluh, tapi Kristus kap si nggeluh I bas aku. Kegeluhenku si genduari ibas doni enda kugeluhken erkiteken kiniteken man Anak Dibata, si ngkelengi dingen si ngendesken diriNa gunangku” (Gal.2:20).
7. Kalak si enggo ipelimbarui perukurenna e idilo ka gelah nggeluh bagi Kristus, maba perubahen, la ngkira kelepaken teman, maba pasu-pasu. Njadiken musuh jadi teman. Kalak si tek idilo maba Berita perdamen e (ay. 19).
   PENGKENAINA
8. Tema: Perukuren si Mbaru
   a. Perukuren si mbaru eme perukuren kalak si enggo nandai ras tek man Jesus Kristus selaku Tuhan ras Juruselamatna.
   b. Perukuren si mbaru e teridah arah carana ngergaken temanna manusia. Lanai ngergakenca erpalas sukat-sukat doni (erta, jabaten, gegeh, lahiriah, rsd), tapi erpalas sukat-sukat Kristus Jesus: kekelengen, la ngkira kesalahen, nuraken kiniulin ntah keselamaten temanna, rohaniah. Njadiken musuh jadi teman. Si la jore jadi melikas.
   c. Kerehen ntah kehadiren kalak si perukurenna pelimbarui eme mpejoreken. Kreatif, inovatif, positif ras konstruktif guna membangun, mpelimbarui.
9. Selaku perukuren si enggo ipelimbarui ibas Kristus:
   a. Statusta selaku kalak si tek man Jesus Kristus eme geluhta enggo ipelimbarui, si male enggo lewat, si mbaru enggo reh. Si male e eme sura-sura ukur manusia: erlua-lua, si nggesuh, la meteh mela, nembah berhala, ras erbahan ilmu sihir, simusuhen, rubati, mecimberu, perampus dingen kepentingenna saja ngenca iukurina. Erbahan perpecahen, erpihak-pihak, sicianen, mabuk, pesta minem-minem seh mabuk rsd. kalak si agenda la dat bagin ibas Kinirajan Surga (Gal. 5:19-21). Perukuren si mbaru eme perukuren si ipimpin Kesah si Badia: Erkekelengen, lit keriahen lit kemalemen ate, kesabaren, perbahanen si mehuli, mehuli, setia. Meteruk ukur, nguasai diri. Kalak si bage, perukurenna selaku manusia enggo isalibkenna i kayu persilang rikut kerincuhen ras sura-surana. Perukurenna ipimpin Kesah e, la meganjang ukur ntah sitokohen, la sicianen (Gal.5:22-26).
   b. Kalak si perukurenna mbaru, tentu ngasup ia ncibalken kegeluhen selaku surat ni Kristus (gambaren Tuhan), ngasup jadi sira ras terang man doni enda (Mat. 5:13-16). Teridah ras ternanami erti kehadirenna.
10. Terkait ras evaluasi Entrepreneurship (kewirausahaan), selaku kalak perukurenna si mbaru baci min kreatif, inopatif, positif ras konstruktif ibas membangun kerina usahana. Contoh kreatif: Israel menemukan anti virus Corona, keluarganta si jadi pasu-pasu, usahanta si kelola dengan maksimal, pelayanennta si tingkatken: Misalna: pelayanen kalak sakit menahun/kebutuhen khusus, kursus menjahit tahap 2, kursus EE guna peningkaten pemahamen PI, pembangunen si terus berlanjut, MWSR si lebih berkualitas ras berkuantitas, sidang ras sermon makin erkualitas, dsb.
11. Perukuren si mbaru pe ngasup mereken filter (penyaringan) nandangi pertakin doni si meneken. Alu bage kita terbuka alu hal-hal si mabru, tetapi tetap memiliki daya selektif.
12. Ibas perukuren si mbaru e kuasa Dibata si nemani ras si ngarak-ngarak kita. E maka gegehta rehna ibas Tuhan nari. E me si erbahan kita megegeh, paguh ras ngasup ermeriah ukur dingen ngataken bujur katawari pe.
    (Pdt.Arapen Peranginangin)