GBKP Batang Serangan Medan

PJJ Tanggal 29 Maret – 04 April 2020

Bahan Ogen : 1 Petrus 2:4-5
Tema : Rehlah Desken Batu Si Nggeluh.

Shalom, man banta kerina.
Perpulungen si ni kelengi Tuhan Yesus Kristus,

Awalnya, bahan PJJ enda isikapken man banta guna ngalo-ngalo Sidang Sinode GBKP pe-36-ken ibas tanggal, 13-18 April 2020. Sendalanen pe ras sehna Berita Si Meriah man kalak Karo 130 tahun ibas tanggal 18 April 2020.
Saja, erkiteken kita pe ikut muat bagin ibas gerakan kiniersadaan raduken kerina elemen bangsa enda mencegah penyebaran virus corona-19, emaka sidang Sinodenta iundurken jadi tanggal 7 – 11 Juni 2020.
Amin bage gia, kita tetap perlu nginget pendilo Dibata man banta selaku Gereja, terlebih ibas enggo 130 tahun Berita Si Meriah e enggo seh man kalak Karo. Arah tema enda mabai kita guna ngenehen kuga kita enggo makeken dirinta desken batu si nggeluh.

Perpulungen sinikelengi Tuhan,
Kita idilo guna reh nandangi Tuhan, Batu Si Nggeluh e. Guna ngangkaisa tole kita banci ngoge Efesus 2: 20-22, nina, “ Kam pe ipajekken i babo palas si tamaken rasul-rasul ras nabi-nabi, janah Kristus jine me palas persukina. Si nentuken susunen kerina bagin-bagin bahan-bahanen e. Bahan-bahanen e tambah belinna janah jadi Rumah Pertoton si Badia i bas Tuhan. Ibas persadaanndu ras Kristus, kam pe ras kerina kalak si deban iranggut jadi sada rumah, i ja Dibata ringan alu KesahNa”. Arah nats enda, siangka maka Yesus me Batu Si Nggeluh e. Aminna kalak la ngergaken Ia entah la memperhitungken Ia, tapi Dibata milih ia dingen ngergaken Ia. Ia jadi batu palas persukina. Kerina bagin-bagin bahan-bahanen e irakut alu batu palas persukina, seh maka enggo banci pajek jadi sada bangunen. Bagem pentingna batu palas persukina e.
Ibas kita reh ndahi Batu Si Nggeluh, penggejapenta pe arusna bagi Batu Si Nggeluh e. Ertina, ibas kita arus lit penggejapen maka kita labo kai pe, labo meherga. Tapi kenca kita ersada ras Kristus Yesus, ije maka kita ndatken fungsinta. Arah e pe kita banci ngatakennca maka kegeluhen kalak Kristten la banci pulah ibas kiniersadanna ras Kristus. Kita ngakui maka gegehta, kepentarennta, kengasupenta, ras kinigenggenta labo lit adi la kin kita rembak ras Yesus Kristus. Kita pe nggejapken maka kegeluhenta e lit gunana tupung kita tetap ibas bangunen e ija Yesus Kristus jadi palas persukina. Kita megegeh erkiteken kita ersada sapih-sapih kita kalak si erkiniteken.

Perpulungen sinikelengi Tuhan,
Kai dage fungsinta ?
Ibas pengogenta ndai ikataken maka kita ibahan Dibata jadi Imam. Fungsi imam isingetken pe emekap guna mpersembahken man Dibata persembahen pertendin si ngena ate Dibata. Kai ertina e ? Ibas 1 Petrus 2: 9, tole ikataken nina, “ Tapi kam e me bangsa pilihen, imam-imam Raja, bangsa sikerajangen Dibata, anak-anak Dibata si ipilih guna meritaken perbahanen-perbahanen Dibata si mbelin. …”. Alu e tangkas maka fungsinta emekep meritaken perbahanen-perbahanen Dibata si mbelin.
Kuga dage carana kita meritaken perbahanen-perbahanen Dibata si mbelin ibas situasi si genduari enda ? Jadilah kita kalak Kristen si tetap semangat, optimis, kalak si tek maka kuasa Dibata si mimpin kita mentasi situasi enda. Tuhu enggo melala dampakna man banta erkiteken covid-19 enda, amin bage gia la kita biar-biaren, bagi kuan-kuan enggo cirawisi awihna. Enggo turah pinakitna, labo erkiteken e enggo jadi, tapi erkiteken enggo jadi ukurenna. Si sampat-sampaten lah kita, sipegegeh-pegegehen kita gelah ras-ras kita ngasup mentasi perbeben enda. Belas-belas simpegegehilah sibelasken kita.
Bagenda me kita, ibas ngalo-ngalo Sidang Sinodenta bage peringetken 130 tahun sehna Berita Si Meriah man kalak Karo, tetap kita ngerembakken dirinta man Batu Si Nggeluh e, bage pe kita kerina reh ersadana, alu bage teridah me fungsina jadi imam si meritaken perbahanen Dibata si mbelin.
Tuhan Dibata Si Masu-masu Kita Kerina. Amin.

Pdt. Tanda Pinem
GBKP Rg. Jl. Sei Batang Serangan Medan

Bahan Ogen : Jesaya 45 : 22-25
Tema : Dahilah Tuhan (Spiritualitas).

Shalom, mejuah-juah man banta kerina.

Perpulungen sinikelengi Tuhanta Yesus Kristus,
Ibas situasi penyebaran Virus Corona-19, tema si seh man banta emekap Spiritualitas. Salah salah sada tolak ukur spiritualitasta rusur inehen arah kerehennta ndahi rumah pertoton Tuhan. Emaka, ibas anjuran kerna penyegahan penyebaran virus corona-19, ija kita iarapken guna erdahin rumah nari, erlajar i rumah ras beribadah i rumah, emaka tempa-tempa nggo urak spiritualitasta. Alu kata sideban, lit si erpangakap maka enggo kita biaren nandangi virus asangken pendilo Dibata guna reh ku rumah pertoton. Kuga nge pengangkanta kerna Dahilah Tuhan entah pe spiritualitas e ?

Sendalanen ras bahan PJJ siisikapken GBKP, kita banci erlajar kerna spiritualitas. Rikutken bahan ogen PJJ, ije isengetken kerna pendilo Dibata man kerina bangsa-bangsa guna ndahi Tuhan. Engkai maka Dibata erdilo ?
Guna ngangkai pendilo Dibata enda kita banci ngoge mulai Yesaya 44:24. Mulai Yesaya 44:24, ije ituriken kerna Dibata ngenca Dibata si sada, la lit si deban. Dibata nuriken maka Ia ngenca Dibata, la lit si deban, alu erbage-bage cara.
Sipemena. Ia me si nepa manusia, mulai kin ibas bertin nari. Ia sinjadiken si nasa lit, si sada, la lit si deban si nampatisa ( Yesaya 44:24). Guru-guru pertendung Kupebodoh-bodoh, nina Dibata. Perkataan kalak pentar ipersilahang Dibata (Yesaya 44:25). Sebalikna, berita si ipeseh persuruhen Tuhan, tuhu-tuhu jadi (Yesaya 44:26). Bagenda me Dibata encidahken kuasaNa nandangi si nasa lit, termasuk pe ibas milih dingen ngangkat Raja Kores. Dibata ngataken kempak Raja Kores, “ Kam merentah guna Aku, lako ndalanken sura-surangKu”, emekap guna naluken bangsa-bangsa, nangtangi kuasa raja-raja, ras nalangi kerabangen kuta-kuta guna Tuhan ( Yesaya 44:28, Yesaya 45:1). Tuhu sulit nge siakap ngalokennca, adi Raja Kores si la nandai Dibata, tapi ikataken Dibata maka ia me raja sipilih ras siidilo Dibata(Yesaya 45:4). Tapi bage me pengakun ibas Kitab Yesaya enda, maka Dibata erkuasa ngaturken kegeluhen raja si la nandai Ia pe.
Sipeduaken. Dibata mpetangkas kuasaNa alu ngataken maka Ia me si nepa doni, janah njadiken manusia guna ngianisa ( Yesaya 45: 12). Dibata kap si nepa langit, la lit dibata si deban, seakatan Ia. ItepaNa ras ipetembeNa doni enda, paguh dingen tahan ibas inganna. Taneh enda itepaNa la burbar, la mesuni tapi mehuli, gelah banci iiani. Nina Tuhan, “Aku kap Tuhan, si deban la lit dibata” (Yesaya 45:18).
Sipeteluken. Kuasa Dibata e tangkas arah Ia singkelini kerina manusia. “Ma kin Aku, Tuhan, Dibata si adil ras si Engkelini ? Seakatan Aku, la lit Dibata”. Mari, dahilah Aku maka kam Kukelini, o kam kerina manusia i doni. Sabab Aku ngenca Dibata, la lit si debanna” (Yesaya 44:21-22). Kata-kata enda itujuken man kalak ‘si erbaris siarak-araken maba gana-gana kayu; siertoto man gana-ganandu’ (Yesaya 44:21). Alu kata si deban, amin kalak enda nembah man gana-gana, janah erkiteken si e kalak enda arusna iukum, tapi Dibata tetap ndilo kalak e guna ikelini, sabab gana-gana e labo banci engkelini. Dibata ngenca si ngasup engkelini. Enda me artina keadilan Dibata. Enda me sinuduhken maka Dibata ngenca Dibata si tuhu-tuhu, la lit si deban. Dibata erpadan, maka kai siikatakenNa e tuhu, janah la mobah-obah. Ibas paksana pagi erjimpuh me kerina manusia ilebe-lebe Dibata, janah ikataken manusia e, “Arah Tuhan ngenca maka lit kemenangen ras kuasa”. Dibata pe nehken padanNa nandangi kesusuren Jakup. Kesusuren Jakup la banci lang ndatken kemenangen.
Enda me palasna maka Dibata ndilo kerina manusia. Dibata ngenca Dibata, la lit si deban. Ia adil dingen erkuasa guna engkelini.
Erpalasken pengangkaanta enda, maka spiritualitas banci sikataken emekap kerehennta guna ndahi Tuhan. Kita reh ndahi pendilo Dibata erkiteken kita tek maka Dibata ngenca, la lit si deban si adil dingen si engkelini manusia. Kita tek maka kegeluhenta enda me bukti keadilen ras pengkelini Dibata. Kita iselamatken Dibata arah kematen Yesus Kristus, aminna gia situhuna kita nge si patut iukum mate. Kai si lit ibas kegeluhenta enda, misalna pemeteh, kengasupen, kesempaten ras erta si lit ibas kita, e pe bukti keadilen ras pengkelini Dibata. Pengakun kerna kegeluhenta enda me bukti keadilan ras pengkelini Dibata sicidahken arah kerehenta ndahi Dibata. Kerehenta ndahi Dibata banci sicidahkan arah erbage-bage bentuk.
Ibas kita reh ndahi Dibata, kita makeken kerina kegeluhenta guna kemulian Dibata. Ija pa pe ras katawari pe, sipakekenlah pemeteh, kengasupen, kesempaten ras erta si lit ibas kita guna mpermuliaken Dibata. Teridahlah kita kalak simpermuliakan Dibata arah perukuren, pengerana ras perbahanennta. Alu kata si deban, kita encidahken spiritualitasta la terbatas ibas ruang ras waktu tertentu saja, tapi katawari pe ras ija pe kita harus encidahken maka kita kalak si reh ndahi Dibata.
Kita pe reh ndahi Dibata ibas ingan ras waktu tertentu, misalna alu ibadah pribadi, ibadah keluarga, ibadah perpulungen ras ibadah minggu.
Alu bage, melala bentukna kita encidahken spiritualitasta. Bentuk-bentuk enda isingetken gelah si eteh maka guna encidahken spiritualitas labo kita hanya ngenehen kubas kerehennta kubas kebaktin minggu saja entah PJJ ( Tidak memakai kehadiran di Gereja atau PJJ sebagai satu-satunya ukuran spiritualitas kita). Emaka adi guna menghambat penyebaran virus corona-19 kin maka kita la erbahan kebaktin minggu ras-ras i gereja entah pe erPJJ raduken ngawan ibas sector PJJ-nta, tapi kita erbahan kebaktin Minggu entah PJJ ibas jabunta masing-masing, labo e encidahken maka enggo kurang spiritualitasta. Spiritualitasta pe teridah ibas pengangkaanta maka kerina kejadin ibas doni enda, termasuk penyebaran virus corona-19, tetap iteruh kuasa Dibata. Bali nge sulitna tupung ngangkai Dibata ndilo dingen milih Kores, si la nandai Dibata, guna jadi raja si mulahi bangsa Israel. Tapi bage me kuasa Dibata. Erkiteken tek kita maka Dibata nge erkuasa ibabo penyebaran virus corona-19 enda, maka sipindolah man Dibata guna engekelini kegeluhen manusia enda. Tetaplah si pindo man Dibata segelah mereken gegeh ras kesehatan man kerina petuga medis si nangani korban virus corona-19 enda, bage pe pasien-pasien ipasu-pasu Tuhan penyembuhenna. Bage pe, adi banci kita “bekerja dari rumah, belajar di rumah dan beribadah di rumah”, e enggo encidahken tanggungjawab spiritualitasta nandangi persoalan penanganan penyebaran virus corona-19 enda.
Ibas situasi penyebaran virus corona-19 enda, sipakekenlah kesempaten enda guna mpegegehi kiniersadaannta itengah-tengah jabunta ras reh teridahlah tetap spiritualitasta.
Tuhan si masu – masu kita kerina.

Pdt. Tanda Pinem

GBKP Rg. Jl Sei Batang Serangan Medan