Ogen : Imamat 1: 1-3
Tema : Arus Mpersembahken Si Mejilena ( Persembahen )
Shalom,
Mejuah perpulungen sinikelengi Tuhan,
Engkai ersembah ?
Dibata e me Dibata si badia, si erkuasa, si enggo mulahi bangsa Israel i Mesir nari dingen netapkanca jadi bangsa Dibata. Erkiteken si e, ibas perdalanenna i gurun pasir, Dibata mereken erbage-bage aturan kegeluhen selaku bangsa Dibata. Salah sada aturen e emekap kerna persembahen. Sue ras temanta, maka persembahen sinisehken e me persembahen si mejilena. Penungkunenna, engkai maka kita nehken persembahen si mejilena ?
Perpulungen sinikelengi Tuhan.
Kinitekennta ngatakenca maka Dibata kap si nepa langit – doni ras kerina isina ( Kejadin 1:1 – 2: 8). Dibata me si mada kerina tinepaNa e (Mazmur 24:1). Dibata pe enggo mereken man manusia hak ras tanggung jawab guna ngusahai dingen njagai langit – doni ras kerina isina (Kejadin 2: 15; Mazmur 115:16). Ibas perdalinen kegeluhennta, manusia ngelakoken hak ras tanggung jawabna guna ngusahai dingen njagai langit – doni ras kerina isina enda emekap ibas ras guna gelar Dibata. Erbage – bage dahin enggo silakoken, subuk sebagai perjuma, perbinaga, pegawai, pengusaha, ras sidebanna. Kita enggo erdahin janah ndatken ulih ibas langit – doni ras isina nari. Dibata si mada kerina sinasa lit, Ia ka me si mereken pasu-pasu man manusia ibas nggeluhken kegeluhenna. Kalak si ngangkai dingen nginget si enda kerina, nehken persembahenna man Dibata. Persembahen e jadi pengakun maka Dibata si mada kerina sinasa lit. Ia me si badia, erkuasa dingen si mereken kegeluhen ras pendahin man banta. Ia masu-masu kegeluhen ras pendahinta. Persembahen e nuduhken maka kita enda tinepa Dibata. Persembahen encidahken kerembakenta nandangi Dibata. Persembahen eme tanda kehamatennta. Persembahen eme tanda pengataken bujurta man Dibata. Kita si ngakui dingen nginget Dibata si mada kuasa, si badia dingen si mereken kegeluhen ras pasu-pasu man banta, maka si mejilena me sinipersembahken man Dibata.
Perpulungen sinikelengi Tuhan,
Tupung Dibata mereken perentah enda man Musa guna ipeseh man bangsa Israel, ikataken maka adi lembu sinipersembahkenna maka arus jenggi lembu simejilena siipersembahkenna. Kai nge ukuren simejilena ? Adi lembu banci ieteh perlembu siapai lembu si mejilena. Bage pe adi galuh, ieteh pergaluh siapai galuh si mejilena. Adi page, ieteh perjuma siapai page si mejilena. Tapi adi ulih pendahinnta e me duit, kai nge si ban sukat-sukatna kerna simejilena ? Buena bilangenna entah rupa duit e si mejilena ? Penungkunen enda mabai kita rukur kerna “benda” sinipersembahken kita. Sukat-sukat persembahen si mejilena labo saja ibas “bendana”, tapi pe ibas kiniteken, pusuh ras ukur kalak sinimpersembahken e.
Nina ibas Mazmur 54:8, “Alu ukur meriah kupersembahken persembahen man baNdu, dingen ngataken bujur man baNdu, sabab mehuli kap Kam o Tuhan”. Arah ayat enda kita banci ngidah sukat-sukat sinipake guna ngenehen persembahen si mejilena. Persembahen e iendesken erpalasken keriahen ukur, bage pengakun kerna kiniulin Tuhan.
Ibas Markus 12:41-44, ituriken kerna persembahen sekalak diberu si enggo mbalu. Yesus ngidah persembahen diberu dingen ngataken man ajar-ajarNa, nina “ Kukataken man bandu: situhuna buen persembahen diberu si enggo mbalu si musil e asangken kerina persembahen kalak si debanna. Sabab kalak si deban ipersembahkenna ibas kinibayakenna si lebih nari, tapi diberu balu-balu e ipersembahkenna ibas kemusilenna nari, itamakenna kerina si lit ibas ia”. Diberu enda encidahken kiniteken ras pengarapenna ibas ersembah. Enda me sukat-sukat si reh ibas pusuh, perukuren, kiniteken kalak sinimpersembahkenca.
Kata Dibata ibas Roma 12 :1, “ O senina-seninangku, nginget perkuah ate Dibata si mbelin si isehkenNa man banta, kupindo man bandu : Endeskenlah kulandu man Dibata saja selaku persembahen si nggeluh rikutken si ngena ateNa. Sabab bage me arusna kam ersembah man Dibata sue ras biakndu selaku mahkluk si rukur”. Arah nats enda, isingetken kerna ngendesken kula selaku persembahen si nggeluh. Enda me persembahen si ngena ate Dibata. Bage pe isingetken kerna proses maka kita seh ku bas ngendesken kula selaku persembahen eme proses nginget ras proses rukur. Selaku mahkluk siitepa Dibata, Dibata mereken penginget ras perukuren man banta. Kita nginget dingen ngukuri perkuah ate Dibata si mbelin, eme sinjemba kita guna ngendesken kula jadi persembahen man Dibata.
Perpulungen sinikelengi Tuhan,
Arah bahan ogen PJJ ibas minggu enda, kita iajuk tole la hanya ngenehen “bendana” saja tapi pusuh, ukur, kinitekenta ibas nehken persembahen e. Enda me si pake jadi sukat-sukatta nehken persembahen si mejilna.
Tuhan si masu-masu kita lako nginget dingen rukur lako nehken persembahennta man Dibata.
Pdt. Tanda Pinem
GBKP Rg. Jl. Sei Batang Serangan