Author: Pt. Empu Satrianta Sitepu, S.Sos

Ogen : Imamat 1: 1-3
Tema : Arus Mpersembahken Si Mejilena ( Persembahen )

Shalom,
Mejuah perpulungen sinikelengi Tuhan,

Engkai ersembah ?
Dibata e me Dibata si badia, si erkuasa, si enggo mulahi bangsa Israel i Mesir nari dingen netapkanca jadi bangsa Dibata. Erkiteken si e, ibas perdalanenna i gurun pasir, Dibata mereken erbage-bage aturan kegeluhen selaku bangsa Dibata. Salah sada aturen e emekap kerna persembahen. Sue ras temanta, maka persembahen sinisehken e me persembahen si mejilena. Penungkunenna, engkai maka kita nehken persembahen si mejilena ?

Perpulungen sinikelengi Tuhan.
Kinitekennta ngatakenca maka Dibata kap si nepa langit – doni ras kerina isina ( Kejadin 1:1 – 2: 8). Dibata me si mada kerina tinepaNa e (Mazmur 24:1). Dibata pe enggo mereken man manusia hak ras tanggung jawab guna ngusahai dingen njagai langit – doni ras kerina isina (Kejadin 2: 15; Mazmur 115:16). Ibas perdalinen kegeluhennta, manusia ngelakoken hak ras tanggung jawabna guna ngusahai dingen njagai langit – doni ras kerina isina enda emekap ibas ras guna gelar Dibata. Erbage – bage dahin enggo silakoken, subuk sebagai perjuma, perbinaga, pegawai, pengusaha, ras sidebanna. Kita enggo erdahin janah ndatken ulih ibas langit – doni ras isina nari. Dibata si mada kerina sinasa lit, Ia ka me si mereken pasu-pasu man manusia ibas nggeluhken kegeluhenna. Kalak si ngangkai dingen nginget si enda kerina, nehken persembahenna man Dibata. Persembahen e jadi pengakun maka Dibata si mada kerina sinasa lit. Ia me si badia, erkuasa dingen si mereken kegeluhen ras pendahin man banta. Ia masu-masu kegeluhen ras pendahinta. Persembahen e nuduhken maka kita enda tinepa Dibata. Persembahen encidahken kerembakenta nandangi Dibata. Persembahen eme tanda kehamatennta. Persembahen eme tanda pengataken bujurta man Dibata. Kita si ngakui dingen nginget Dibata si mada kuasa, si badia dingen si mereken kegeluhen ras pasu-pasu man banta, maka si mejilena me sinipersembahken man Dibata.

Perpulungen sinikelengi Tuhan,
Tupung Dibata mereken perentah enda man Musa guna ipeseh man bangsa Israel, ikataken maka adi lembu sinipersembahkenna maka arus jenggi lembu simejilena siipersembahkenna. Kai nge ukuren simejilena ? Adi lembu banci ieteh perlembu siapai lembu si mejilena. Bage pe adi galuh, ieteh pergaluh siapai galuh si mejilena. Adi page, ieteh perjuma siapai page si mejilena. Tapi adi ulih pendahinnta e me duit, kai nge si ban sukat-sukatna kerna simejilena ? Buena bilangenna entah rupa duit e si mejilena ? Penungkunen enda mabai kita rukur kerna “benda” sinipersembahken kita. Sukat-sukat persembahen si mejilena labo saja ibas “bendana”, tapi pe ibas kiniteken, pusuh ras ukur kalak sinimpersembahken e.

Nina ibas Mazmur 54:8, “Alu ukur meriah kupersembahken persembahen man baNdu, dingen ngataken bujur man baNdu, sabab mehuli kap Kam o Tuhan”. Arah ayat enda kita banci ngidah sukat-sukat sinipake guna ngenehen persembahen si mejilena. Persembahen e iendesken erpalasken keriahen ukur, bage pengakun kerna kiniulin Tuhan.

Ibas Markus 12:41-44, ituriken kerna persembahen sekalak diberu si enggo mbalu. Yesus ngidah persembahen diberu dingen ngataken man ajar-ajarNa, nina “ Kukataken man bandu: situhuna buen persembahen diberu si enggo mbalu si musil e asangken kerina persembahen kalak si debanna. Sabab kalak si deban ipersembahkenna ibas kinibayakenna si lebih nari, tapi diberu balu-balu e ipersembahkenna ibas kemusilenna nari, itamakenna kerina si lit ibas ia”. Diberu enda encidahken kiniteken ras pengarapenna ibas ersembah. Enda me sukat-sukat si reh ibas pusuh, perukuren, kiniteken kalak sinimpersembahkenca.
Kata Dibata ibas Roma 12 :1, “ O senina-seninangku, nginget perkuah ate Dibata si mbelin si isehkenNa man banta, kupindo man bandu : Endeskenlah kulandu man Dibata saja selaku persembahen si nggeluh rikutken si ngena ateNa. Sabab bage me arusna kam ersembah man Dibata sue ras biakndu selaku mahkluk si rukur”. Arah nats enda, isingetken kerna ngendesken kula selaku persembahen si nggeluh. Enda me persembahen si ngena ate Dibata. Bage pe isingetken kerna proses maka kita seh ku bas ngendesken kula selaku persembahen eme proses nginget ras proses rukur. Selaku mahkluk siitepa Dibata, Dibata mereken penginget ras perukuren man banta. Kita nginget dingen ngukuri perkuah ate Dibata si mbelin, eme sinjemba kita guna ngendesken kula jadi persembahen man Dibata.
Perpulungen sinikelengi Tuhan,
Arah bahan ogen PJJ ibas minggu enda, kita iajuk tole la hanya ngenehen “bendana” saja tapi pusuh, ukur, kinitekenta ibas nehken persembahen e. Enda me si pake jadi sukat-sukatta nehken persembahen si mejilna.
Tuhan si masu-masu kita lako nginget dingen rukur lako nehken persembahennta man Dibata.

Pdt. Tanda Pinem

GBKP Rg. Jl. Sei Batang Serangan

Bahan Ogen : 1 Petrus 5 : 5-6.
Tema : Meteruk Ukur Biak Geluthta ( Biak Kalak Si Tek )

Shalom,
Mejuah juah man banta kerina perpulungen sinikelengi Tuhan Yesus,
Sikataken bujur man Dibata, erkiteken Dibata namaken kita nggeluh ibas sada perpulungen. Ibas sada-sada perpulungen lit ije si jadi tua-tua/ pertua entah pemimpinna, bage pe lit ije ngawan perpulungenna. Surat Petrus enda isehken guna ngaturken kegeluhen ibas perpulungen e. Adi si oge mulai ayat 1 seh ayat 5a, kita banci meteh lit kewajiban timbal balik antara tua-tua/ pertua entah pemimpinna, nandangi ngawan perpulungen. Adi siperdiatken kata “kalak si enggo metua” sinipake ibas I Petrus 5: 5 emekap πρεσβυτέροις. Kata enda bali ras kata sinipake ibas 1Petrus 5:1 emekap Πρεσβυτέρους. Kata dasar duana kata enda emekap Πρεσβυτέρ si ertina elder (bhs Inggris) ;tua-tua, pemimpin, entah pe pertua-pertua. Alu mbandingken ayat 1-4 ras ayat 5a, maka siidah ije kewajiban timbal balik antara tua-tua, pemimpin, entah pe pertua-pertua nandangi ngawan perpulungen ( I Petrus 1: 1-4: Kewajiben pertua-pertua nandangi ngawan perpulungen) bage pe sebalikna lit kewajiben ngawan perpulungen ( si lebih nguda ) nandangi tua-tua, pemimpin, entah pe pertua-pertua ( I Petrus 1:5a kewajiben ngawan emekap patuh ).
Arah nehken kewajiben timbal balik enda me maka kegeluhen perpulungen banci bertumbuh ras berkembang. Arah kiniersadaan enda me maka perpulungen banci encidahken jati dirina sebage bangsa pilihen , imam-imam Raja, bangsa sikerajangen Dibata, anak-anak Dibata si ipilih guna meritaken perbahanen-perbahanen Dibata si mbelin ( I Petrus 2:9). Kuga banci perpulungen e encidahken jati diri enda, adi itengah-tengah perpulungen e la ndalanken kewajibenna masing-masing.
Kenca nekanken tangunggungjawab masing-masing, emaka ibas ayat 5b, iajuk me kerina perpulungen e, subuk tua-tua / pertua-pertua/ pemimpin bage pe ngawan perpulungen, gelah alu meteruk ukur erbentingkibul guna sisampat-sampaten. Ibas ayat 8, ikataken kerna iblis, imbangndu e gawah-gawah ku jah ku je bagi sada singa si erngaung ndarami si man jerngemenna. Bage pe ibas ayat 9, lit ije isingetken kerna kiniseran siinanami kalak si tek i belang-belang doni. Arah duana ayat enda, banci sikataken maka perpulungen ngalaken perbeben si mberat, si banci saja ipakeken iblis guna nirangken kita ras Dibata. Erkiteken si e, perpulungen siajuk alu meteruk ukur erbentingkibul guna sisampat-sampaten. Semua bekerja keras untuk saling menolong, sebab ini permasalahan yang berat. Jangan menganggap bahwa itu bukan persoalan saya. Rendah hatilah.
Barrack Obama, mantan presiden Amreika Serikat, menyatakan adanya pola pikir yang berbahaya yang mengancam Amerika Serikat saat menangani pandemi virus korona19 ini. Pola pikir itu ialah sikap egois, kesukuan, terpecah belah dan melihat orang lain sebagai musuh. Obama juga mengatakan ini telah menjadi bencana ketika pola pikir “ apa untungnya bagi saya” dan “apa peduli dengan orang lain” diterapkan dalam pemerintahan Amerika Serikat saat ini. (CNN Indoensia : Obama Anggap Penanganan Corona ala Trump sebagai Bencana, Minggu,10/05/2020)
Kai sinikataken Obama enda perlu si tengeti. Ola erkiteken kita la terdampak kal, la kita mediate nandangi kalak si deban. La kita perduli nandangi kalak si deban alu la menjaga jarak, la memakai masker, la cuci tangan, ras la erdiate nandangi kesehatennta. Meteruk ukurlah. Enda me pinakit si banci si cegah alu peduli nandangi diri sendiri ras peduli nandangi kalak si deban. (Dengan menjaga diriku, aku melindungi diri banyak orang)
Kita pe meteruk rukur ngidah melalana korban akibat pandemic corona-19 enda. Subuk si enggo terganggu ekonominta, terganggu kesehatan pusuh perukurenta, terbatas kita encidahken kekelengenta nandangi senina-turangta entah kade-kadenta si sakit entah si idilo Dibata. Emaka tetaplah kita muat bagin guna nampati teman-temanta enda kerina. Nina ibas I Petrus 4:11, “ Kalak si ngerana, ngeranalah alu kata-kata si tempa-tempa rehna ibas Dibata nari. Kalak si nampati, isampatinalah kalak alu gegeh si ibereken Dibata man bana…”.
Alu meteruk ukur erbentingkibul guna sisampat-sampaten me kita encidahken biakta / jati dirinta selaku bangsa pilihen Dibata, itengah-tengah situasi pandemi virus korona-19 enda.
Tek kita nandangi kai sinikatakan ibas I Petrus 5:5c, …”tapi man kalak si meteruk ukurna icidahkenNa lias ateNa”, bage pe ibas ayat 6, … gelah ibas paksa si payo, ipeganjangkenNa kam”. Enda me tole si njemba kita guna meteruk ukur erbentingkibul guna si sampat-sampaten.
Bujur.
Mejuah-juah kita kerina.

Pdt. Tanda Pinem

GBKP Rg. Jl. Sei Batang Serangan

Bahan Ogen : Mazmur 92 : 1-5.
Tema : Rende Meritaken Keleng Ate Dibata.

Shalom,
Mejuah-juah man banta perpulungen sinikelengi Tuhan,
Lit sada ilustrasi nina bagenda. 2 kalak sipaksana muas icidahken man bana gelas si lit launa. Jelma sipemena ngidah gelas e, emaka nina, gelas e kosong setengah janah berjut ayona. Jelma sipeduaken ngidah gelas e, emaka nina, gelas risi setengah janah siang ayona. Dua na kalak ngidah gelas si bali, janah nuriken kai si benar. Tapi kalak enda berbeda ibas carana ngidah kai si benar. Perbedaan cara ngidah sibenar menghasilkan reaksi si beda ka. Sada berjut ayona dingen sada nari siang ayona. Bagenda me kita ngidah situasi enda. Kita radu ras ngalaken situasi pandemi covid-19. Caranta ngidah situasi enda nentuken kuga reaksinta ngalakenca. Arah Mazmur 92, kita banci erlajar guna ngidah perjuangan kegeluhen enda.
Ibas Bahasa Karo, nina Mazmur 92 : 2 “O, Tuhan, seh riahna ngataken bujur man baNdu, janah rende muji Kam, o Dibata si Meganjangna. Ibas Bahasa Indonesia, nina “Adalah baik untuk menyanyikan syukur kepada TUHAN, dan untuk menyanyikan mazmur bagi nama-Mu, ya Yang Mahatinggi”.
Kuga maka ikataken seh riahna atau baik ngataken bujur man Tuhan ?
Kami menghubungkenca ras ayat 5-6, nina, “ Sabab perbahanenNdu kap si pegedang ukurku, erkiteken perbahanenNdu, aku rende alu meriah. O Tuhan, seh kal belinna PerbahanenNdu, andiko bagesna PerukurenNdu”. Tentuna, pemazmur ngukuri kai si jadi maka idatna kesimpulan si bagenda. Hal ini berkaitan dengan aktivitas pikiran yang mencari makna dari sebuah rahasia. Kita mengambil waktu sejenak untuk berpikir, menghayati sebuah peristiwa, mencari apa maknanya dan akhirnya Allah membukakan rahasiaNya sehingga kita menemukan betapa besar pekerjaan Tuhan dan betapa dalamnya rancanganNya. Gelah seh kita kubas pengakun “seh kal riahna muji Tuhan”, enda sibenaken alu makeken waktu lebe guna ngukuri dingen darami kai ertina peristiwa si jadi e. Misalna, ikataken ibas Mazmur 92:7-10, “Kalak bodoh la ngasup ngantusisa, kalak longgor la ngasup ngerti, ngkai maka kalak jahat turah mehumur desken dukut, kalak si ilat reh bayakna dingen sikap geluhna. Tapi nandangi meripuk me ia kerina, sabab Kam, o Tuhan, erkuasa seh rasa lalap. Ieteh kami maka kernep me kerina imbangNdu, kerina kalak jahat marpar merap me”. Payo tuhu, labo kita ngasup ngangkaisa, saja ibukaken Tuhan, maka kernep me imbang Dibata, emekap kalak jahat. Kepeken kalak jahat e labo imbangta saja, tapi imbang kalak jahat eme kap Dibata. Emaka Dibata nge siengkernepkensa. Alu bagenda me kita ngasup ngidah perbahanen Dibata si mbelin. Perbahanen Dibata si mbelin enda sigejapken pemazmur sipegedang ukurna dingen njemba ia guna rende alu meriah, ngataken bujur man Dibata.

Perpulungen sinikelengi Tuhan,
Genduari enda, kita ngenanami pandemi virus korona. Pandemi enda tuhu-tuhu maba kiniseran man banta. Saja mari kita ndarami dingen ngukurisa, kai-kai saja si mehuli si turah arah kejadin enda. Banci jadi arah kejadin pandemi enda kita reh paguhna kiniteken ras reh rembakna kita man Dibata sebab kita ngangkai maka kegeluhen manusia tuhu-tuhu terancam kal, rapuh, la ergegeh, tapi Dibata ngenca si ngasup ngkelini kita. Arah kejadin enda erbahanca kita tuhu-tuhu makeken jabunta jadi gereja, ingan pertumbuhen iman nandangi seisi jabunta. Alu cara ngidah kejadin arah si mehuli, e me sierbahanca kita ngasup ngatakenca, “ seh riahna ngataken bujur man Tuhan”. Alu bage, gelah kita banci muji Dibata alu meriah, amin gia kita ibas paksa ngenanami perbeben, sidatlah lebe kai-kai saja perbahanen Dibata si mbelin si enggo ilakokenNa ibas kegeluhenta.

Perpulungen sinikelengi Tuhan,
Engkai seh riahna ngataken bujur man Tuhan. Ibas paksa kita rende ngataken bujur ije me kita nuduhken pengakunta kerna Dibata dingen ise kita. Allah adalah Tuhan yang menciptakan kita dan kita adalah umat ciptaannya. Ibas kita rende muji Dibata, ije me kita nembah Dibata, ije me kita rembak ras Dibata, ije me kita ngakui kuasa ras kepentaren Dibata ngaturken kegeluhen doni enda. Enda me si erbahanca meriah ukurta sebab kita jumpa ras si mada kita, siengkelengi kita.

Perpulungen sinikelengi Tuhan,
Engkai seh riahna atau baik ngataken bujur man Tuhan ? Ende-enden pengataken bujur enda la hanya erguna paksa kita rende, tapi ende-endennta e jadi pergegeh man banta guna wari-wari reh enda. Rusur kita ngendeken kerna kuasa Dibata, eme si jadi penginget man banta ibas ngalaken perbeben geluhta. Kita nginget perbahanen Dibata si mbelin si erbahanca reh tetapna kiniteken ras ukurta ngalaken perbeben e, sabab tek kita Dibata erkuasa nampati kita ibas ngalaken perbeben geluhta. Enda me ertina adalah baik untuk menyanyikan syukur kepada Tuhan. Baik karena menguatkan dan mengokohkan perjuangan hidup kita. Terkhusus ibas paksa pandemi virus korona enda, reh metedehnalah ateta rende muji keleng ate Dibata. Ende-endenta si nginget kerna keleng ate Dibata eme si jadi nakan pertendinnta. Alu bage reh gegehna pertendinta ngalaken kebiaren-kebiaren si genduari enda. Emaka sipakekenlah waktunta guna rende muji Dibata.

Perpulungen sinikelengi Tuhan,
Engkai seh riahna atau baik ngataken bujur man Tuhan ? Selain baik untuk kita, ketika kita bernyanyi mengucap syukur, itu juga menjadi kebaikan bagi orang lain sebab nyanyian ucapan syukur itu adalah kesaksian kita kepada orang lain. Arah ende-endenta, kita encidahken perbahanen Dibata si mbelin sigejapken kita nandangi kalak si deban. Genduari enda, alu litna kemajun teknologi informasi, kita banci mbagiken ende-enden pujinta man kalak si deban. Sekarang ini, kita mendapatken pengertian dari Efesus 5 : 19, “dan berkata-katalah seorang kepada yang lain dalam mazmur, kidung puji-pujian dan nyanyian rohani. Bernyanyi dan bersoraklah bagi Tuhan dengan segenap hati”. Emaka sipakeken teknologi informasi enda guna mbagiken ende-enden pertendin si mpegegehi pertendin kalak si deban.

Perpulungen sinikelengi Tuhan,
Enda me piga-piga sincidahken engkai maka seh riahna atau baik ngendeken ende-enden pengataken bujur man Tuhan. Mari dage sipakeken waktunta guna ngukuri perbahanen Dibata dingen rende ngataken bujur man Dibata. E keriahen dingen baik untuk kita dan orang lain.
Bujur, Dibata si masu-masu kita.

Pdt. Tanda Pinem

GBKP Rg. Jl. Sei Batang Serangan