Author: Pt. Empu Satrianta Sitepu, S.Sos

Bahan Ogen : Yohanes 19 : 38-42
Tema : Nehken Kekelengen Arah Budaya.

Perpulungen sinikelengi Tuhan,
Tep-tep masyarakat nggeluh erbudaya. Arah erbudaya, tep-tep kalak ibas anggota masyarakat e meteh inganna, fungsina ras tanggungjawabna. Erkiteken arah budaya kita meteh cara nggeluhken geluhta si sue ras kecibalta itengah-tengah masyarakat e. Ibas bahan PJJnta enda kita iperhadapken kubas tema ndalanken kegeluhenta “budayanta” itengah-tengah situasi pandemic covid-19.
Ibas bahan PJJnta enda isingetken man banta kerna Jusuf Arimatea ras Nikodemus sindalanken budayana. Jusuf Arimatea eme sekalak pengikut Yesus tapi la ia terang-terangen sabab mbiar ia kalak Jahudi si erkuasa. Sedangken Nikodemus eme sekalak pemimpin agama Yahudi si berngi-berngi ngerna ras Yesus. Jusuf Arimatea mindo man Pilatus gelah banci muat mait Yesus. Raduken Nikodemus, duana kalak enda ngelegi mait Yesus. Ibalutina mait Yesus alu kain bentar dingen irempah-rempahina alu kira-kira telu puluh kilo minak mur ras minak gaharu rikutken adat kalak Yahudi. Emaka ikuburkenna me mait Yesus ibas kuburen si mbaru.
Ibas duana kalak enda ndalanken budaya enda, piga-piga pengertin banci sidatken.

1. Lit kinipangen. Jusuf Arimatea la terang-terangen ngikutken Yesus, bage pe Nikodemus ibas berngi-berngi njumpai Yesus. Tapi kenca kematen Yesus, kalak enda enggo pang encidahken dirina selaku kalak sierdiate nandangi Yesus. Jusuf Arimatea pang mindo mait Yesus man Pilatus. Nikodemus selaku sekalak pemimpin agama Yahudi raduken Jusuf Arimatea ngelegi mait Yesus, sedangken pemimpin agama Yahudi nge si mindoken segelah Yesus iukum mate. E tentuna beresiko man bana, tapi tetap idalankenna. Enda me ertina sinikataken Yesus rikutken Yohanes 12:32-33, “dan Aku, apabila Aku ditinggikan dari bumi, Aku akan menarik semua orang datang kepada-Ku. Ini dikatakan-Nya untuk menyatakan bagaimana caranya Ia akan mati ”.
2. Lit pengorbanen. Secara materi, kalak enda nikapken telu puluh kilo minak mur ras minak gaharu ras kuburen si mbaru guna mait Yesus. Tentuna meherga kal erga minak ras kuburen si mbaru e. Banci pe sikataken maka duana kalak enda lanai memperhitungken pandangen kalak ras resiko lanai iergaken kalak siberseberangen nandangi sikap ras perbahanen kalak enda duana. Duana kalak enda tentuna ngkorbanken perukuren ras waktuna guna ngukurken dingen ngelitken kai siniperluken guna ndalanken peradaten ibas kematen Yesus. Waktuna singkat erkiteken antara kematen Yesus ras persikapen wari sabat cukup rapat. Amin bage gia, kerina banci iaturkenna.
   Bagenda me duana kalak enda ndalanken peradatenna kerna si mate-mate ibas budaya kalak Yahudi.
   Kita pe selaku kalak Karo nggeluh berbudaya. Ibas budayanta lit ije sistem nilai-nilai, sistem agama, politik, adat istiadat, bahasa, perkakas, pakaian, bangunan ras karya seni sebagai pedomanta ibas berprilaku si sue ras budayanta kalak Karo. Mulai kin anak e ibas bertin nandena seh ka mulih ku bas bertin taneh enda enggo ratur iaturken si arah lebenta. Amin gia ikataken enggo ratur iaturken si arah lebenta, tep-tep budaya beradaptasi rikutken perkembangan jaman e. Ibas teptep budaya lit ije sistem nilai-nilai si mengatur kai si masuk akal ras ras kai-kai saja si banci sialoken ibas peradaten e guna menyesuaikan ras perkembangen jaman. Emaka banci ikataken maka ibas budaya pe lit nge perubahenna. Misalna, nai ipake gendang entah pe alat music tradisional guna mengiringi dahin-dahin peradatennta, tapi genduari enggo banci si pake gendang keyboard. Terlebih selaku kalak si tek man Tuhan Yesus, lit bagin-bagin ibas budayanta si lanai sidalanken erkiteken lanai sue ras kinitekennta. Misalna, hal-hal siberhubungen ras kuasa-kuasa kiniperbegun. Contohna, niktik wari, ersimbu, perumah begu, ras sidebanna.
   Rikutken situasi pandemi virus korona enda, perdalanen budayanta e enggo kena dampakna. Guna mencegah penyebaren virus korona enda, pemerintahta erbahan pembatasen-pembatasen. Pemerintahta mengharusken erdahin rumah nari, erlajar i rumah bage pe beribadah i rumah. Adi kin harus ndarat, kita harus memakai masker dingen menjaga jarak, menghindari kerumunan dan keramaian. Terlebih nandangi kalak si enggo i kelompokken sebage Orang Dalam Pemantauan, Pasien Dalam Pengawasan ras Pasien Covid-19 harus menjalani isolasi subuk mandiri bage i rumah sakit khusus. Kita lanai banci kontak fisik ras kalak enda kerina. Nandangi korban virus korona siidilo Dibata, pemerintah enggo erbahan peraturen ija penanganen korban enda ilaksanaken petugas khusus janah kita keluarga lanai banci ndalanken peradatennta. Situasi enda erbahanca kita lanai banci ndalanken peradatenta sue bage semalna.
   Adi sihubungken ras perbahanen Jusuf Arimatea ras Nikodemus si pang ngalaken resiko guna ndalanken adat kekelengen e, maka ibas kita terbatas ndalanken adat kekelengenta e, labo ngatakenca kita la pang ngalaken resiko ibas ndalanken kekelengen e. Perlu siukuri maka pembatasen e labo saja erhubungen man dirinta saja, tapi pe guna keselamaten enterem kalak si deban. E maka caranta rukur genduari enda perlu si pelimbarui. La kita ermorah-morah, nembeh ate, segat ate entah rubat erkiteken kurang siakap kalak reh ndahi kita tupung genduari enda. Ngasup kita ngaloken maka komunikasi arah telpon entah media sosial si debanna sebage gancih kehadiren kulanta guna nehken kekelengen. Si pakeken alat komunikasinta guna nehken pergegeh man kalak si deban. Perlu pe kita ndarami dalan si deban ibas nehken kekelengen e. Bagi Jusuf Arimatea ras Nikodemus si pang berkorban, kita pe iajuk guna ngidah sekelewetta, teman-temannta, sangkep geluhta si ngenanami kiniseran erkiteken pandemi virus korona enda. Si sehken penampatta subuk secara pribadi-pribadi bage pe secara perpulungen. Banci secara langsung si taruhken entah lewat pengiriman barang. Lenga si eteh katawari ngadina pandemi enda, emaka perlu tetap ersikap nehken kekelengen.
   Pulung-pulung memang la terban kita genduari enda, tapi kekelengen e la ka bo la terdalanken. Tetaplah sidalanken kekelengen e.

Pdt. Tanda Pinem

GBKP Rg. Jl. Sei Batang Serangan

Bahan PJJ : 1 Tesalonika 5:19-24
Tema : Ujilah Lebe, Cikep Si Mehuli. (TI, Ulihna)

Shalom, Mejuah-juah.
Perpulungen sinikelengi Tuhan,
Sikataken bujur, ibas tanggal 18 April 2020, enggo 130 tahun Berita Si Meriah seh man kalak Karo. Wari sehna Berita Si Meriah enda me siperingeti sebagai wari ulang tahun GBKP. Bage pe ibas wari e kita mperingeti perdalanen 130 Tahun KAKR GBKP. Selamat ualng Tahun GBKP ras KAKR GBKP.

Perpulungen sinikelengi Tuhan,
Ibas perkembangen pencegahan pandemi virus corona-19, teridah kal partisipasi ngawan perpulungen. Arah group-group WA, Facebook, Instragam ras media sosial lainna, ngawan-ngawan perpulungen ikut berpartisipasi guna mereken kata pergegeh, semangat, motivasi ras inspirasi si erpalasken Kata Dibata. Group-group ibas media sosial melala kal iisi Kata Dibata. Ngawan perpulungen nggejapken enda bagin tanggung jawabna janah teridah pe semangat kiniteken, kesetian ras ketutusen ersembah man Dibata. Semangat kiniteken, kesetian ras ketutusen ersembah man Dibata si lit ibas perpulungen ndatken dalanna jadi pergegeh man kalak si deban arah litna ketrampilan ngawan perpulungen ibas makeken teknologi informasi. Arah e pe banci kita ngidah litna pertumbuhen ras perkembangen erkiniteken ngawan perpulungen. Kepeken sada dampar si deban ibas litna virus corona enda, teridah pe pertumbuhen kiniteken ngawan perpulungen. Enda perkembangen si sangat mehuli.

Guna tetap mehuli ras reh teremna kalak siterlibat ibas makeken teknologi informasi guna mereken semangat erpalasken kiniteken man Tuhanta Yesus Kristus, kata temanta enda perlu tole sipegermetken. Nina temanta Ujilah lebe, cikep si mehuli. Kata tema enda ibuat ibas sada ayat ibas ogenta I Tesalonika 5:19-24. Engkai Paulus mereken pedah enda man perpulungen Tesalonika ?
Ibas 1 Tesalonika 3, ieteh Paulus maka perpulungen Tesalonika ngenanami kiniseran-kiniseran. Ada kecemasan Paulus tentang iman orang Tesalonika karena adanya penyiksaan yang dialami jemaat Tesalonika. Paulus nuriken isi pusuhna ibas 1 Tesalonika 2:5, nina “… Lanai tergengken aku, emaka kusuruh ia ndahi kam guna pepayo ntah tetap denga kam tek man Dibata ntah lang…” Kenca mulih Timotius i Tesalonika nari, idatsa me berita maka perpulungen Tesalonika tetap erkiniteken dingen erkekelengen. Enda tuhu-tuhu berita si mereken keriahen man Paulus.
Emaka Paulus mereken nasehatna man perpulungen Tesalonika alu pengarapen segelah ngawan perpulungen e nggeluh serta dingen badia ilebe-lebe Dibata asum reh pagi Tuhan Yesus. Lit dua fokus nasehat Paulus. Fokus si pemena emekap kerna perbahanen perpulungen ibas kegeluhenna sekalak-sekalak ( I Tesalonika 4:1-12) ras sipeduaken emekap perbahanen perpulungen itengah-tengah jemaat ( I Tesalonika 5:12-28).
Ibas fokus sipemena enda, Paulus mendorong perpulungen e lebih maju ndalanken kiniteken ras kekelengenna. Lit dua dampar pemindon Paulus e. Dampar si pemena, bagi siisuratken ibas I Tesalonika 4:1-8, Paulus ningetken kerna Perpulungen Tesalonika si enggo nggeluhken geluhna sentudu ras peraten Dibata. Jenari Paulus mindo man perpulungen Tesalonika gelah ndalankenca lebih asa si e. Pemindon Paulus e me kap kerna milih ndehara. Sekalak dilaki ietehna min muat ndeharana alu cara badia dingen terpuji. Enda erkiteken sura-sura Dibata gelah ngawan perpulungen nggeluhken geluhna selaku kalak siiserapken jadi sikerajangan Dibata, nggeluh badia(4:7), labo guna erlua-lua. Dampar sipeduaken, bagi siisuratken ibas I Tesalonika 4:8-12. Paulus ningetken maka perpulungen Tesalonika enggo ndalanken kekelengen nandangi teman-teman sada kiniteken. Jenari Paulus mindo segelah perpulungen ndalankenca lebih asa si e. Sinimaksudken Paulus eme segelah ngawan perpulungen nggeluh alu tenang, la ncampuri perkara kalak si deban, janah erdahin guna ncukupken keperlun geluhna.
Ibas fokus sipeduaken, Paulus mereken pedah-pedahna kerna kuga perpulungen e nggeluhken geluhna itengah-tengah perpulungen. Sue ras bahan ogenta, itengah-tengah kegeluhen perpulungen ola min lit singambati pendahin Kesah Si Badia. Kata Kesah Si Badia, ibas I Tesalonika, lit isuratken 4 kali, emekap I Tesalonika 1:5;6, 4:8, 5:19. Ibas I Tesalonika 1:5;6, isingetken maka sehna berita si meriah ras sierbahanca perpulungen e tek eme erkiteken pendahin Kesah Si Badia. Ibas I Tesalonika 4:8 ikataken Paulus maka kalak si nulak pengajaren kerna sura-sura Dibata, maka Dibata si mereken Kesah Si Badia me siitulakna. Ibas I Tesalonika 5:19, ikataken Paulus segelah ula ambati pendahin Kesah Si Badia. Alu e banci sikataken maka ula ambati pendahin Kesah Si Badia ertina emekap ula ambati pendahin Kesah Si Badia sinaksiken kerna Berita Si Meriah ras sura-sura Dibata. Ibas situasinta genduari enda, tek kita maka Kesah Si Badia makeken enterem kalak guna mpeseh Kata Dibata ras sura-sura Dibata alu makeken teknologi informasi. Saya mengaminkan gerakan partisipasi jemaat dalam memberikan semangat menghadapi pandemi virus corona berdasarkan iman akan Firman Tuhan adalah salah satu manifestasi gerakan Roh Kudus dalam diri jemaat. Inilah yang tetap kita tumbuh-kembangkan. Kita tetap mengharapkan semangat, antusiasme, kegairahan jemaat dalam berpartisipasi tetap teguh, kuat dan bertahan lama. Mari kita dorong agar semakin banyak orang yang ikut ambil bagian dalam gerakan ini, bukan malah dipadamkan. Artinya jangan merasa minder, tidak mampu dan merendahkan semangat orang lain dalam memberitakan Firman Allah sehingga padam semangat untuk memberitakan Firman Allah. Ini sama saja dengan memadamkan Roh Kudus dalam diri kita atau orang lain.
Nasehat Paulus berikutna emekap ola anggap enteng nandangi berita kerna sura-sura Dibata. Kata sura-sura Dibata lit 4 kali isingetken. Ibas I Tesalonika 3:3, Paulus ningetken gelah perpulungen ola murtad erkiteken kiniseran si jadi, sabab kiniseran sijadi ibas e, eme sada bagin ibas sura-sura Dibata. Ibas I Tesalonika 4:3 ras 7, Paulus ningetken sura-sura Dibata nandangi geluh perpulungen emekap gelah perpulungen nggeluh badia, labo nggeluh erlua-lua. Paulus nehken pengajaren enda sekaligus ningetken kerna persikapen perpulungen ibas kerehen Kristus. Ibas I Tesalonika 5:9-10, ikataken, “ Kita ipilih Dibata labo gelah sinanami ukumen si reh ibas Ia nari, tapi gelah sialoken keselamaten arah Tuhanta Jesus Kristus, si enggo mate man gunanta elah banci kita nggeluh ersada ras Ia, subuk kita nggeluh denga ntah enggo mate asum Ia reh pagi”. Adi sikawitken ku nats renungenna, ola anggap enteng nandangi sura-sura Dibata, ertina kegeluhen perpulungen e arus tetap sendalanen ras sura-sura Dibata, nggeluh badia, sabab e nentuken kerna pengalonta kegeluhen ersada ras Tuhan Yesus tupung Ia reh pagin. Jadi, jangan anggap enteng pengajaran Tuhan, sebab itu menentukan bagaimana nantinya kita hidup.
Berikutna Paulus mereken persinget segelah perpulungen e tetap metenget nandangi pengajaren bage pe perbahanen-perbahanen sijadi isekelewet kegeluhen perpulungen. Idatas ndai, Paulus 2 kali ningetken kerna nggeluh badia, la erlua-lua. E ertina, Paulus meteh sada tantangan si mbelin siniadapi perpulungen e me kegeluhen erlua-lua. Bage pe pedah Paulus ibas I Tesalonika 4:11-12, nuduhken maka lit kebiasan si jadi i sekelewet perpulungen, taren-taren ncampuri urusen kalak piah dungna lanai tercukupkenna keperlun dirina jine. Kerna biak, kebiasaan silit i sekelewet perpulungen e, sibanci ngelangketi kegeluhen perpulungen piah dunga ndabuh me kubas perbahanen si jahat, si ajarken Paulus gelah perpulungen e ngujisa. Lakoken si mehuli, silahken si jahat. Ibas kegeluhennta genduari enda, kai sinikataken Paulus e tetap jadi perukurennta. Ujilah pengajaren, biak, kebiasaan si jadi isekelewetta segelah kita tetap ibas kegeluhen si mehuli, labo ndabuh kubas perbahanen si jahat. Terkhusus ibas makeken teknologi informasi, metengetlah kita nandangi berita-berita si seh man, bage pe periksa janah periksa ulang berita si ateta si peseh man kalak si deban. Simehulilah tetap sidalanken.
Kedungenna, ibas ayat 23-24, Paulus nehken toto ras mereken pergegeh man perpulungen maka Dibata me si mereken kemalemen ate, sierbahanca perpulungen e badia dingen Dibata nge sierbanca ma kerina e jadi. Kita pe tek maka Dibata me si mereken gegeh man banta, ibas situasi bagenda, tetap kita ipengasup Dibata ndalanken si mehuli, nggeluh badia.

Tuhan Dibata simasu-masu kita. Amin.

Pdt. Tanda Pinem

GBKP Rg. Jl. Sei Batang Serangan